«Біз біргеміз!»
ИГІ ІСТІҢ БАСТАУЫ-
ЖАҚСЫЛЫҚ ЖАСАУ
Біз қазақ халқы қашанда «Жетімін жылатпаған, жесірін қаңғытпаған» дана халықпыз. Еліміздегі жарияланған карантин жағдайына байланысты қазіргі таңда өңіріміздегі жалғызбасты аналарға қолұшын созып, көмек көрсету-біздің азаматтық борышымыз болып табылады. Әсіресе, Қасиетті Рамазан айында жасалған көмектің-мың сауабы болары сөзсіз.
Осы орайда, «Біз біргеміз» республикалық акциясы аясында аудан орталығындағы Алматы облысының пал-лиативтік көмек көрсету ауруханасының директоры Иманәлиев Дәурен Жұмазыұлының мұрындық болуымен және аталған ұжымның бірауыздан қолдау көрсетуімен, өңірдегі бес жалғызбасты аналар бірінші қажеттіліктегі азық-түлікпен қамтылды. Атап айтсақ, отбасыларға 25 кг ұн, қант, макарон, күріш өнімдері, шай, сұйық май табысталды. Осындай қиын-қыстау сәтте ұжым қызметкерлерінің өз қаражаттары есебінен демеушілік көрсетуі-өте құптарлық және сауабы мол іс.
«Елім дейтін ері болмаса, ерім дейтін елі қайдан болсын» демекші, осындай қолы жомарт, мәрт азаматтарымызды аудан жұртшылығы қашанда мақтан етеді. Өйткені, қайырымдылық-қашанда адамның жүрегін мейірімді ете түседі.
Алтынай СЕЙТКЕН, "БАЛҚАШ ӨҢІРІ".
