Еліміздің ертеңгі болашағы жас ұрпақ болғандықтан оларға терең де, сапалы білім берудің жаңа әдіс-тәсілдерін құрастыру бүгінгі күннің өзекті мәселесі болып отыр. Жаһандану заманында жас ұрпақтың жаңаша ойлау қабілетін, белсенділігін арттыру, білімге деген құштарлығын ояту, өмірінде оны қолдана білуге үйрету- ұстаздың басты міндеті деп білемін. Ұстаздардың үздіксіз білімін арттыру мақсатында М.Сеңгірбаев атындағы орта мектепте математика пәнінен «Инновациялық технологиялар арқылы оқушылардың функционалдық сауаттылықтары мен шығармашылық қабілеттерін дамыту» тақырыбында бастауыш сынып мұғалімдеріне арналған курс өтті. Курсты Өрлеу» БАҰО» АҚ орталығының физика-математика ғылымдарының доценті Абдіқади Мұстафаев өткізді.
«Үйретер талай тәлім, талай есеп» демекші, курстан алғанымыз көп болды. Курс барысында оқушылардың ойлау қабілеттерін қалыптастыру, іскерлік дағдыларын дамытуға арналған логикалық тапсырмалар, дарынды және үлгерімі төмен оқушыларға арналған есептер және оны шешудің заңдылықтары, олимпиадалық тапсырмалар, математика сабағында қолданылатын жаңа әдістер, бір тақырыптың басқа тақырыппен ортақтастығы өзара байланыстырылып, берілген білім жаңа бағдарламамен ұштастырыла түсіндірілді.
Математика сабағында ең бастысы тапсырманы оқушы орындамас бұрын есептің берілгенін түсінуі, ең тиімді әдісін таңдай білуі, сонымен қатар мұғалім оқу үдерісінде жаңа әдіс-тәсілдерді орынды қолдануы маңызды орын алады. Жаңартылған бағдарлама аясында өткізілген курста оқу әдістерін курс барысында жұптық, топтық тапсырмалар орындату арқылы оқытудың жаңа әдістерін меңгеруге мүмкіндік берген тренеріміз Абдіқади Мұстафаевқа алғысымызды айтамыз.
Математика ғылымы өмірмен байланысты қиын, әрі өте қызық пән екендігімен ерекше. Әртүрлі әдіс-тәсілдермен және өмірмен байланыстыра өтілген әр сабақ оқушы санасына қонымды, әрі кейінгі өміріне азық болары сөзсіз. Сондықтан, мұғалім оқушыны математика пәнінің қыр-сырына үйрету үшін оған математикалық сауаттылықты сақтау жөнінде күнделікті талаптар қойып, оның орындалуына көңіл бөлгені жөн.
Ғалия МОЖАНОВА,
№1 Жамбыл атындағы орта мектептің бастауыш сынып мұғалімі
