Жаңа Конституция туралы сөз қозғағанда, ең алдымен, оның адам өміріндегі маңызына, қоғам алдындағы жауапкершілігіне және ел болашағына ықпалына назар аударуымыз қажет. Өйткені мемлекеттің басты байлығы – оның халқы. Адамның қадір-қасиетін құрметтеу, құқықтары мен бостандықтарын қорғау, әр азаматқа тең мүмкіндік беру – құқықтық мемлекеттің негізгі қағидаттары.
Заң үстемдігі – әділетті қоғамның басты шарты. Қоғамда заң бәріне ортақ әрі бірдей орындалғанда ғана азаматтардың мемлекетке деген сенімі артады. Заң талаптарын сақтау, құқықбұзушылыққа жол бермеу, әділдік пен жауапкершілікті жоғары қою – өркениетті қоғам қалыптастырудың маңызды алғышарттары. Конституция осы құндылықтардың құқықтық негізін айқындайды.
Жаңарған Ата Заңның маңызын азаматтардың құқықтық сауаттылығын арттырумен де байланыстыра қарастырған жөн. Әрбір адам өзінің құқықтары мен міндеттерін білуі, заң талаптарын құрметтеуі және қоғам өміріне белсенді араласуы тиіс. Себебі елдің дамуы тек мемлекеттік органдардың қызметіне ғана емес, азаматтардың да саналы әрекеті мен ортақ жауапкершілігіне байланысты.
Адам капиталы мен білім – ел болашағының тірегі. Қазіргі кезеңде білімді, бәсекеге қабілетті, отаншыл әрі жаңашыл ұрпақ тәрбиелеу ерекше маңызға ие. Жас ұрпақтың сапалы білім алуына, шығармашылық қабілетін дамытуына және өз әлеуетін жүзеге асыруына жағдай жасау – мемлекеттің стратегиялық міндеттерінің бірі. Осы тұрғыдан алғанда, Конституцияда бекітілген білім алу, еңбек ету және жеке тұлғаның дамуына қатысты құқықтардың маңызы зор.
Кез келген мемлекеттің өркендеуі қоғамдық бірлік пен тұрақтылыққа тікелей байланысты. Қазақстан үшін бейбітшілік, ұлтаралық келісім, өзара құрмет пен татулық – баға жетпес құндылықтар. Қоғамдағы әртүрлі көзқарастарға түсіністікпен қарап, ортақ мүдде жолында бірігу елдің тұтастығын нығайтады.
Сонымен қатар Конституцияда белгіленген қағидаттардың нақты өмірде жүзеге асуы маңызды. Құжаттағы әрбір норма азаматтардың күнделікті өмірінен көрініс тауып, мемлекеттік басқаруда, әлеуметтік салада және қоғамдық қатынастарда заңдылықтың сақталуына ықпал етуі қажет. Конституцияның шынайы құндылығы да оның өміршеңдігімен және қоғам игілігіне қызмет етуімен өлшенеді.
Жаңарған Конституция – тек құқықтық нормалар жиынтығы емес, ол – мемлекет пен қоғам арасындағы өзара сенім мен жауапкершіліктің негізі. Оны құрметтеу – елдің тарихына, тәуелсіздігіне және болашағына құрметпен қарау деген сөз. Әр азамат заңды сақтау арқылы елдің тұрақты дамуына, қоғамдық тәртіптің нығаюына және әділетті ортаның қалыптасуына үлес қоса алады.
Күмісбек Ербаев,журналист.
