29 қараша-ҚР мәслихаттары депутаттарының кезектен тыс сайлауы

image.png

Кожабеков Канат Саутханович - 1973 жылы Бақанас ауылында дүниеге келген.

1980 жылы мектеп табалдырығын аттап, 1990 жылы орта мектепті тәмамдаған.

Білімін жетілдіру мақсатында жоғары оқу орындарында білім алып, 2012 жылы Орталық Азия университетін «Экология» мамандығы бойынша бакалавр дәрежесімен бітірген. 2018 жылы Қазақ ұлттық аграрлық университетінде «Балық шаруашылығы және өнеркәсіптік балық аулау» мамандығы бойынша сырттай білім алып, бакалавр дәрежесін иеленген. Ал 2022 жылы Қазақ ұлттық аграрлық зерттеу университетінің «Орман ресурстары және орман шаруашылығы» мамандығы бойынша білімін жетілдіріп, бакалавр дәрежесін алған.

Еңбек жолын 2008 жылы Алматы облысы Балқаш ауданындағы «Сауытхан» шаруа қожалығында қожалық меңгерушісі болып бастаған.

2004–2009 жылдары «Бірлік» ЖШС агрофирмасында эколог-гидротехник қызметін атқарған. 2009–2015 жылдары аталған мекемеде балық құтқару бригадасының меңгерушісі-эколог болып еңбек етіп, табиғи су айдындарын қорғау және балық қорын сақтау бағытындағы жұмыстарға атсалысқан.

2018–2020 жылдары Бақанас орман шаруашылығы мекемесінде орман шебері болып қызмет атқарған. Ал 2020–2022 жылдары «Іле-Балқаш» мемлекеттік табиғи резерваты республикалық мемлекеттік мекемесінде бас аңшылық маманы, орман күзеті инженері және бөлім басшысы лауазымдарында еңбек еткен.

2022 жылдан бастап қазіргі уақытқа дейін «Іле-Балқаш» мемлекеттік табиғи резерваты РММ-нің бас директоры қызметін абыроймен атқарып келеді.

Отбасылы, бір баланың әкесі.

 

САЙЛАУАЛДЫ БАҒДАРЛАМАСЫ

Мен аудандық мәслихат депутаттығына сайланған жағдайда, 2027–2031 жылдар аралығында туған өлкемнің әлеуметтік-экономикалық дамуына, ауыл тұрғындарының тұрмыс сапасын арттыруға және ауданымыздағы өзекті мәселелердің оң шешімін табуына бар күш-жігерімді жұмсаймын.

Мен үшін депутат болу – тек мәртебе емес, ең алдымен халық алдындағы үлкен жауапкершілік. Сондықтан сайлаушылардың сенімін ақтап, тұрғындардың талап-тілектері мен ұсыныстарын аудандық мәслихатта көтеріп, олардың орындалуына ықпал етуді басты міндетім деп санаймын. Ауылдың дамуы ең алдымен оның тұрғындарының өмір сүруіне қолайлы жағдай жасауға, әлеуметтік мәселелерді шешуге және елді мекендердің инфрақұрылымын жақсартуға байланысты. Осы бағытта төмендегідей жұмыстарды жүзеге асыруға ықпал етемін.

Аудан тұрғындарының әлеуметтік жағдайын жақсарту – басты басымдықтарымның бірі. Әсіресе, әлеуметтік осал топтарға жататын азаматтардың баспана мәселесіне ерекше көңіл бөлемін.

2027–2031 жылдар аралығында инвестиция тарту, мемлекеттік бағдарламалар мен қосымша қаржыландыру көздерін қарастыру арқылы Балқаш ауданының барлық ауылдық округтерінде әлеуметтік осал топтарға арналған тұрғын үйлер салу мәселесін көтеріп, оның шешілуіне ықпал етемін.

Баспанаға мұқтаж көпбалалы отбасыларды, әлеуметтік қолдауды қажет ететін азаматтарды және тұрғын үй кезегінде тұрған тұрғындарды қолдау шараларының тиімді жүзеге асуына атсалысамын. Бұл бағытта тиісті мемлекеттік органдармен бірлесе жұмыс жүргізіп, тұрғын үй құрылысына жеке инвестиция тарту мүмкіндіктерін де қарастырамын.

Ауыл көшелерінің жағдайы – тұрғындардың күнделікті өміріне тікелей әсер ететін маңызды мәселе. Сапалы жол – балалардың мектепке қауіпсіз қатынауына, тұрғындардың емханаға, жұмыс орындарына және басқа да қажетті нысандарға кедергісіз жетуіне мүмкіндік береді.

Ауыл шаруашылығы – аудан экономикасының негізгі тіректерінің бірі. Сондықтан қарапайым шаруа қожалықтарының дамуына жағдай жасау, олардың мемлекеттік қолдау шараларына қол жеткізуіне көмектесу маңызды деп есептеймін.

Мемлекеттік субсидиялар мен жеңілдетілген несиелердің ірі шаруашылықтармен қатар шағын және орта шаруа қожалықтарына да қолжетімді болуына ықпал етемін. Шаруалардың құжат рәсімдеу, қаржыландыру бағдарламаларына қатысу және мемлекеттік қолдау алу барысында кездесетін мәселелерін тиісті мекемелер алдында көтеремін.

Сондай-ақ ауыл шаруашылығы кооперативтерін құруға, жеке қосалқы шаруашылықтарды дамытуға, мал және егін шаруашылығымен айналысатын азаматтардың мүмкіндіктерін кеңейтуге қолдау көрсетемін.

Округтегі кәсіпкерлердің ұсыныстары мен мәселелерін назарға алып, олардың заңды мүдделерін қорғауға және кәсіпкерлік қызметті дамытуға кедергі келтіретін мәселелерді шешу жолдарын іздестіруге атсалысамын. Нәтижесінде жергілікті бюджеттің кіріс бөлігін арттыруға және аудан экономикасының нығаюына үлес қосуды көздеймін.

Спортпен шұғылданатын балалар мен жастардың аудандық, облыстық және республикалық жарыстарға қатысуына қолдау көрсетіп, олардың жол шығындары мен қажетті ұйымдастыру мәселелерін шешуге ықпал етемін.

Жер – ауылдың негізгі байлығы, ал оны тиімді пайдалану – экономикалық дамудың маңызды шарты. Ауыл маңындағы және аудан аумағындағы мақсатты пайдаланылмай жатқан жерлерді анықтап, оларды заң аясында мемлекет меншігіне қайтару жұмыстарын жандандыру мәселесін көтеремін.

Бұл бастама ауылдағы жер ресурстарын тиімді игеруге, жаңа жұмыс орындарын ашуға және ауыл тұрғындарының табысын арттыруға мүмкіндік береді деп сенемін.

Аудан экономикасының тұрақты дамуы кәсіпкерліктің өркендеуімен тығыз байланысты.

Жергілікті кәсіпкерлерге қолдау көрсету, жаңа кәсіп түрлерін ашуға жағдай жасау және ауыл тұрғындарының өз кәсібін бастауына мүмкіндік туғызу – алдағы бес жылдағы маңызды міндеттерімнің бірі.

Осы бағытта «Ауыл аманаты» жобасының мүмкіндіктерін тиімді пайдаланып, ауыл тұрғындарының жеке қосалқы шаруашылықтарын, отбасылық кәсіпкерлігін және шағын өндіріс орындарын дамытуына ықпал етемін.

Ауылдардың дамуы тек жергілікті бюджетке ғана байланысты болмауы керек. Сондықтан мемлекеттік бағдарламалармен қатар, жеке инвестициялар тарту, демеушілік көмектер мен гранттарды пайдалану, басқа да қосымша қаржыландыру көздерін қарастыру бағытында жұмыс жүргіземін.

Бұл қаражаттарды ауылдардың әлеуметтік және инженерлік инфрақұрылымын дамытуға, тұрғындардың тұрмыс сапасын жақсартуға, кәсіпкерлікті қолдауға және жаңа жұмыс орындарын ашуға бағыттау мәселесін көтеремін.

Әрбір ауылдық округтің өзіндік ерекшеліктері мен қажеттіліктерін ескере отырып, тұрғындардың ұсыныстары негізінде нақты жобаларды жүзеге асыруға күш саламын.

Мен үшін ең маңыздысы – сайлаушылардың сенімін ақтау, халықпен тығыз байланыста болу және елдің көкейінде жүрген мәселелерді шешуге нақты үлес қосу.

Депутат ретінде тұрғындардың өтініштері мен ұсыныстарын мұқият тыңдап, олардың шешілуі үшін аудандық мәслихатта мәселе көтеріп, тиісті мемлекеттік органдармен жүйелі жұмыс жүргіземін.

Әрбір бастаманың орындалу барысын бақылап, сайлаушылар алдында атқарылған жұмыстар туралы тұрақты есеп беріп отыруды азаматтық әрі депутаттық міндетім деп білемін.

Менің ұстанымым – құр сөз емес, нақты іс, құрғақ уәде емес, нәтижеге бағытталған жұмыс.

Туған жеріміздің өркендеуі, ауылдарымыздың көркеюі, тұрғындарымыздың әл-ауқатының артуы жолында аянбай еңбек етуге дайынмын.

Бірлігіміз бекем, тірлігіміз берекелі болса, алынбайтын асу жоқ.

Туған жердің дамуы – баршамызға ортақ міндет!

 


Жарнама орны (6)

Мүмкін сізді қызықтыратын тақырыптар:

  • 29 қараша-ҚР мәслихаттары депутаттарының кезектен тыс сайлауы
  • 29 қараша-ҚР мәслихаттары депутаттарының кезектен тыс сайлауы
  • 29 қараша-ҚР мәслихаттары депутаттарының кезектен тыс сайлауы
  • 29 қараша-ҚР мәслихаттары депутаттарының кезектен тыс сайлауы
  • 29 қараша-ҚР мәслихаттары депутаттарының кезектен тыс сайлауы