Фото: Шымкент қалалық «AMANAT» партиясының филиалы
Шымкент қаласында халықтық штаб мүшелері №87 жалпы орта мектебінде ұстаздармен кездесті. Жиында жұмысшы топ атом электр станциясының ел дамуына қосатын үлесі туралы түсіндірме жұмыстарын жүргізді, деп хабарлайды Azattyq Rýhy.
Насихаттық топтың құрамында «AMANAT» партиясы атқарушы хатшысының орынбасары Ербол Байқонысов, сондай-ақ бірқатар партиялардың өкілдері болды.
Жиынды ашқан Ербол Рәбілұлы АЭС жобасы туралы маңызды ақпараттармен бөлісіп, оның экономикаға келтірер пайдалы тұстарын атап өтті.
«Қазіргі таңда, әлемнің 30-дан астам елінде 415 реактор жұмыс істеп тұр. Оның көпшілігі АҚШ, Ресей, Қытай, Франция сияқты алпауыт мемлекеттерде орналасқан. Одан бөлек, тағы 60-тан астам реактордың құрылысы жүргізіліп жатыр. Яғни, АЭС тоқ көзін өндірудің ең дұрыс тәсілі екенін әлем мойындап отыр. Демек, бұл экономиканың ілгерілеуіне ерекше әсерін тигізеді деген сөз», — деді Ербол Рәбілұлы.
Баймырза Умаров еліміздегі энергетика саласының қазіргі жағдайы туралы мағлұматтармен бөлісіп, халық санының өсуі және кәсіпкерлік нысандардың артуына байланысты электр энергиясына деген сұраныс жыл сайын 3%-ға артып келе жатқанын айтты.
«Бұл жағдай жалғаса берсе, алдағы ондаған жылда аталған сала аса күрделі проблемаларға тап болуы мүмкін. Сондықтан болашақта кездесетін мәселелерді шешуге қазірден қамдануымыз керек», — деді ол.
Болат Тауасаров АЭС тақырыбына қатысты қоғамда жиі кездесетін бірқатар сауалдарға жауап берді.
«Ел ішінде «АЭС салғанша неге күн, жел, су электр станцияларын көбейтпейді» деген пікірлер айтатындар бар. АЭС-ке балама ретінде айтылып отырған станциялар да салынатын болады. Бірақ, ол станциялардың тоқ өндіру қуаты ауа райына тікелей байланысты болғандықтан, тұрақты тоқ көзіне жатпайды», — деді ол.
Жиын соңында азаматтар тарапынан бірқатар сұрақтар қойылып, оларға тұшымды жауаптар берілді.
Осылайша, жиын барысында АЭС салудың маңыздылығы, энергетика саласындағы мәселелер мен қоғамдық пікірлер талқыланды.
