«Заң мен тәртіп» идеологемасы аясында қоғамдық қауіпсіздікті қамтамасыз ету мақсатында 2026 жылғы 18-20 маусым аралығында Балқаш ауданы аумағында «Түнгі қаладағы балалар» жедел-профилактикалық іс-шарасы өткізілуде.
Іс-шараның негізгі мақсаты – жасөспірімдер арасындағы құқық бұзушылықтар мен қылмыстың алдын алу, кәмелетке толмағандардың құқықтарын қорғау, олардың құқықтық сауаттылығын арттыру және балаларға қатысты құқыққа қарсы әрекеттердің жолын кесу.
Рейдтік іс-шаралар барысында түнгі уақытта заңды өкілдерінің қарауынсыз жүрген кәмелетке толмағандар анықталып, олардың ата-аналарына немесе заңды өкілдеріне Қазақстан Республикасы ӘҚБтК-нің 442-бабына сәйкес әкімшілік шаралар қолданылады.
Сонымен қатар, бала тәрбиесі мен қауіпсіздігіне немқұрайлы қараған ата-аналар заңнама талаптарына сәйкес жауапкершілікке тартылады.
Құрметті ата-аналар! Балаларыңыздың қауіпсіздігіне ерекше көңіл бөліп, олардың кешкі және түнгі уақытта заңды өкілдердің бақылауынсыз жүруіне жол бермеңіздер.
