Қоғам өміріндегі маңызды шешімдер әр азаматтың белсенді қатысуын талап етеді. Соның бірі – референдум. Бұл – халықтың өз болашағына қатысты тағдырлы мәселелерді тікелей дауыс беру арқылы шешуі. Дәрігер ретінде мен референдумды тек саяси науқан емес, елдің денсаулығы мен әлеуметтік тұрақтылығына әсер ететін маңызды қадам деп бағалаймын.
Қазақстан – болашағын бейбіт жолмен, халықтың пікірі арқылы айқындауды мақсат еткен мемлекет. Референдум – сол мақсатқа жетудің демократиялық тетігі. Денсаулық сақтау саласында еңбек етіп жүрген маман ретінде қоғамдағы тұрақтылық пен бірлік халықтың денсаулығына тікелей ықпал ететінін жақсы білемін. Себебі ел ішінде тыныштық болса, медицина саласы да жүйелі дамиды, жаңа технологиялар енгізіледі, халыққа көрсетілетін қызмет сапасы артады.
Дәрігер күн сайын адамның өмірі мен тағдырына жауап береді. Сол секілді әр азамат референдум кезінде ел тағдырына жауапкершілікпен қарауы тиіс. Бұл – болашақ ұрпақ алдындағы парыз. Салауатты қоғам қалыптастыру тек ауруды емдеумен шектелмейді. Ол үшін әділ шешімдер, тұрақты саясат және халықтың сенімі қажет.
Референдум – халық пен билік арасындағы сенімді нығайтатын құрал. Әрбір дауыс – маңызды. Дәрігер ретінде мен азаматтарды ел болашағына бейжай қарамауға, өз таңдауларын саналы түрде жасауға шақырамын. Өйткені дені сау ұлт – тұрақты мемлекеттің негізі.
Мәди ТҰРАР, дәрігер.
