Ұлы Жеңістің 80 жылдығына орай Алматы қаласында Грек-рим және еркін күрес түрлерінен U-17 жасөспірімдер арасында Қазақстан чемпионаты болып өтті.
Республика көлемінде өнер көрсетіп жүрген кіл мықтылар арасында бақ сынаған жерлесіміз Дамир Сейткерім чемпион атанып, аудандық балалар мен жасөспірімдер спорт мектебінің үкілі үмітін ақтап, аудан абыройын асқақтатты.
Екі күнге созылған Республикалық чемпионатты қорытындылай келгенде Дамир Мархабатұлы Грек – рим күресі бойынша өткен белдесу барысында 55 келі салмақ дәрежесінде қарсыластарынан басым түсіп, алтыннан алқа тақты. Ал еркін күресі бойынша өткен тартыс белдесуде 60 келі салмақты дәрежесінде өзінің ептілігін көрсетіп, чемпион атанды.
Республикалық чемпионатта қос алтынды еншілеген жерлесі-міздің осындай биік белесті бағындыра білгені жаттықтырушысы Назтай Бақтығалиұлының еселі еңбегінің жемісі десек артық айтқанымыз болмас.
Өз тілшімізден.
