Алматы облысының Талғар қаласында ерекше спорттық челлендж — «Велосипедпен – референдумға» өтті. Акцияға велоспорт бойынша он жаттықтырушы қатысты. Қатысушылар велосипедтермен қаланың басты көшелерімен жүріп өтіп, тек тамаша спорттық дайындықтарын ғана емес, командалық рухтарын және салауатты өмір салтына адалдығын да көрсетті.
Спорттық акция достық, спорттық жігер және көтеріңкі көңіл-күй атмосферасында өтті. Жарыс аяқталғаннан кейін барлық қатысушылар №833 сайлау учаскесіне барып, өз азаматтық таңдауын жасап, ел тағдырына қатысу маңыздылығын көрсетті.
«Біздің спорттық акциямыз белсенді азаматтық ұстаным — әрбір адамның өмірінің ажырамас бөлігі екенін көрсетеді. Спорт пен қоғам алдындағы жауапкершілік бір-бірін толықтырады», — деді Алматы облысының велоспорт бойынша аға жаттықтырушысы Евгений Пеляйкин.
Талғардағы велоспорт мектебі Қазақстанның оңтүстік-шығыс өңіріндегі жетекші орталықтардың бірі саналады. Мұнда ұлттық құрамалар мен кәсіби командаларға резерв қалыптасады, ал мектеп тәрбиеленушілері жастар мен ересектер құрамаларының сапын тұрақты түрде толықтырып отырады. Бұл Талғарды болашақ чемпиондарды даярлайтын нағыз орталыққа айналдырады.
Осы акция спорт арқылы адамдарды біріктіріп, қоғам өміріне белсенді қатысуға шабыттандыратынын айқын көрсетті. Сонымен бірге, салауатты өмір салты мен азаматтық жауапкершілік — бүгінгі және болашақ ұрпақ үшін ажырамас құндылықтар екені дәлелденді.
