Мен – ел көрген, талай заманды бастан өткерген қариямын. Уақыттың талай сынын көріп, тәуелсіздіктің қадірін жүрекпен сезінген ұрпақтың өкілімін. Бүгінгі референдум – жай ғана саяси науқан емес, бұл – ел болашағына бейжай қарамайтын әр азаматтың жауапкершілігін айқындайтын маңызды қадам.
Біздің қасиетті жеріміз – Қазақстан – талай тарихи кезеңдерден өтті. Ел тағдыры таразыға түскен сәттерде халқымыз әрдайым бірлігін сақтап, ақылмен шешім қабылдай білді. Осындай маңызды сәттердің бірі – референдум. Бұл – халықтың өз ойын ашық білдіріп, мемлекет дамуының бағытын айқындайтын демократиялық құрал.
Қария ретінде айтарым, елдің ертеңі – бүгінгі таңдауымызға байланысты. Біз немере-шөбереміздің жарқын болашағын ойласақ, қоғамдық мәселелерге немқұрайлы қарамауымыз керек. Әр дауыс – аманат. Әр шешім – ұрпақ алдындағы жауапкершілік.
Жастарға айтарым: ата-баба аңсаған азаттықтың бағасын біліңдер. Тәуелсіз елде өмір сүру – үлкен бақыт. Ендеше, елдік мәселелерде белсенді болу – азаматтық парыз.
Референдум – татулық пен тұрақтылықтың кепілі болсын. Халқымыз бірлік пен парасат жолынан таймасын. Ақсақал ретінде тілерім – ел аман, жұрт тыныш, болашақ баянды болсын.
Бекен ШЫБЫҚБАЕВ, ауылдық Ақсақалдар алқасының төрағасы.
