Алматы облысының денсаулық сақтау басқармасының "Еңбекшіқазақ көп бейінді орталық аудандық ауруханасы" коммуналдық мемлекеттік кәсіпорнына жүргізілген ішкі мемлекеттік аудит нәтижелері бойынша бірқатар қаржылық және рәсімдік бұзушылықтар анықталды.
Аудит барысында кәсіпорын тарапынан жалпы сомасы 79,6 млн. теңге көлемінде бұзушылықтар тіркелді. Оның ішінде қаржылық бұзушылықтар 21,6 млн. теңгені, ал рәсімдік бұзушылықтар 58,0 млн. теңгені құрады.
Мемлекеттік сатып алуларда да заң бұзушылықтар анықталды. Техникалық сипаттамалардың тек орыс тілінде ұсынылуы, келісім шарттардағы талаптардың орындалмауы сияқты мәселелер тіркелді. Бұған қоса, бірқатар қызметкерлерге заңсыз артық төлемдер жасалғаны белгілі болды.
Аудиторлық қорытындының негізінде кәсіпорынның басшылығы мен лауазымды тұлғаларына қатысты шаралар қабылданды. Аталған бұзушылықтарды жою үшін 2025 жылғы 30 сәуірде нұсқама беріліп, тәртіптік жауапкершілік шаралары қарастырылды. Кәсіпорын тарапынан орын алған кемшіліктер бойынша тиісті түзетулер енгізіліп, қажетті шаралар қабылданғаны хабарланды.
