Алматы облысында тұмау мен ЖРВИ-дің таралуы ерекше бақылауға алынды.
Облыстың Бас мемлекеттік санитариялық дәрігері Марат Исмаиловтың айтуынша, қыркүйек айынан бері 60 мыңнан астам адам медициналық көмекке жүгінген, олардың 63%-ы 14 жасқа дейінгі балалар. Тұмау Жамбыл, Еңбекшіқазақ, Іле аудандары мен Қонаев қаласында өршіп тұр.
Жыл сайын облыста ЖРВИ-дің 500 мыңнан аса жағдайы тіркеледі.
Бас дәрігердің дерегінше, өткен жылмен салыстырғанда сырқаттанушылық деңгейі 18%-ға төмендегенімен, биылғы тұмау маусымы ауыр болады деп болжануда.
«Биылғы тұмау вирусының А типі (H1N1 және H3N2) ауыр өтуде. Бұл жылдам таралып, асқыну қаупінің жоғары болатыны алаңдаушылық туғызады», – деп атап өтті Марат Исмаилов.
Тұмаудан қорғанудың ең тиімді жолы – вакцинация. Алматы облысында вакцинациялау науқаны 15 қыркүйекте басталды. Қазіргі таңда өңір халқының 10%-ы вакцина алды.Оның ішінде 15 мың медицина қызметкері, 5 мыңнан астам жүкті әйел және 848 қарттар үйінің тұрғындары екпе салдырды .Облысқа «Гриппол плюс» вакцинасының 160 мың дозасы жеткізілді, аталған екпе толықтай пайдаланылды. Мамандар,екпенің күші бір жылға дейін жетеді дейді.
