Мемлекет басшысы Қасым-Жомарт Тоқаевтың бастамасымен Республика көлемінде жүзеге асырылып жатқан «Таза Қазақстан» экологиялық акциясы аясында әр бейсенбі күндері аудан көлемінде тазалық жұмыстары жүргізіліп келеді.
Әр отбасының табалдырығынан бастау алған тазалық жұмыстары «Таза көше», «Таза ауыл» және «Таза саябақтар» тақырыптарында жүзеге асырылып, аудан көлемінде бірқатар іс-шаралар атқарылып келеді.
Аталмыш акция аясында атқарылған тазалық жұмыстарының нәтижесінде ауыл көшелері күл – қоқыстардан тазаланып, көше бойындағы ағаштар әктеліп, саябақтардағы балалар ойын алаңдарына жөндеу, сырлау жұмыстары жасалынды.
Апта сайын атқарылып жатқан тазалық жұмыстарына мекеме қызметкерлері, кәсіпкерлер және ауыл тұрғындары атсалысуда.
Республика көлемінде қолға алынған акцияның басты мақсаты - экологиялық сана мен экологиялық мәдениетті қалыптастыру және нығайту, ауыл ажарына ұқыптылықпен қарау, қоршаған ортаның тазалығын сақтап, әсемдігін келер ұрпаққа жеткізуге зор үлес қосатындығы айдан анық.
«Таза Қазақстан» идеясының артында өзіміздің туып - өсіп, тұрып жатқан өңіріміздің тазалығын сақтап, туған жерге деген сүйіспеншілікті арттырып, экологиялық мәдениетті қалыптастыру мәселесі жатыр.
Сондықтан да аталмыш акция аясында қолға алынған тазалық жұмыстарын біркісідей атқарып, тазаланған жерлерді таза ұстайық, ағайын дегім келеді!
Өз тілшімізден.
