Өткен аптада аудан орталығындағы денешынықтыру және спорт кешенінде аудандық бұқаралық-спорттық іс-шараларды өткізу орталығының ұйымдастыруымен волейбол спортынан ересектер арасында аудандық біріншілік болып өтті.
Спорттық жарыста өнер көрсеткен аудан көлеміндегі ауылдық округтерден келген командалар өзара бақ сынасып, жүлделі орындарды бөліске салды. Жүлдеден үміттенген спортшылар ойын алаңында еркін көсіліп, өз командаларының намысын қорғап, ала допты алақандарында ұршықтай иіріп, жарыстың көрігін қыздыра түсті.
Қорытындылай келгенде І-ші орынды Бура командасы жеңіп алды. Ал ІІ-ші орын Бірлік командасының ойыншыларына бұйырса, жүлделі ІІІ-ші орынды көкталдық спортшылар місе тұтты.
Тартысты өткен спорттық шараның жабылу салтанатында аудан көлеміндегі бақ сынаған 18 командалар арасынан үздік танылған спортшыларға, жарыстың демеушісі «Агрофирма «Бірлік» ЖШС-нің директоры Алмас Қыстаубаев арнайы дайындаған ақшалай сый-сияпатын табыстады.
Осылайша аудандық біріншілікте бақ сынаған волейболшылар арасында өткізілген жарыс өз мәресіне жетті.
Күмісбек ЕРБАЕВ, «Балқаш өңірі».
